O‘zbekiston Respublikasi Jamoat xavfsizligi universiteti “Ijtimoiy-gumanitar fanlar” kafedrasi tomonidan Harbiy-vatanparvarlik oyligi doirasida unversitet 1-bosqich kursantlarining jamoalari ishtirokida “Buyuk sarkardalarimiz harbiy merosi” nomli intellektual tanlov o‘tkazildi. 2023-yilning 26-dekabr kuni “Ijtimoiy-gumanitar fanlar” kafedrasi tashabbusi bilan unversitet 1-bosqich kursantlarining jamoalari ishtirokida uch shart asosida “Buyuk sarkardalar harbiy merosi” nomli tanlov tashkil etildi. Tanlov harbiy-vatanparvarlik oyligi doirasida harbiy xizmatchilarda vatan tarixi, buyuk sarkardalar jasoratlari, jang usullari, zafarli g‘alabalari haqida yanada to‘liqroq ma’lumotlar olish maqsadida tashkil qilindi. Tanlovda 1-bosqich kursantlari sarkardalarning qo‘shin tuzilishi, sarkardalar hayotiga doir biliss savollar va “Temur tuzuklari” bilimdoni shartlari bo‘yicha bellashdi. Tanlovni “Ijtimoiy-gumanitar fanlar” kafedrasi ustozlari baholab bordi. Bir-biridan qiziqarli va jumboqli bo‘lgan savollarga javob berish jarayonida yana bir karra buyuk sarkardalarimiz harbiy mahorati, jang taktikalarining mukammalligiga kursantlar amin bo‘ldi. Tanlov shartlari bo‘yicha 1-o‘rinni 383-guruhning “Jaloliddin izdoshlari” jamoasi, 2-o‘rinni 373-guruhning “Amir Temur vorislari” jamoasi va 3-o‘rinni 382-guruhning “Bobur vorislari” jamoalari egalladi. Tanlov g‘oliblari turli darajadagi diplom va tashakkurnomalar bilan taqdirlandi.