O‘zbekiston Respublikasi Prezidenti Administratsiyasining tegishli topshirig‘iga asosan oliy ta’lim muassasalari talabalarini kitob mutolaasiga jalb etish, badiiy savodxonlik darajasini oshirish orqali ularni vatanparvarlik va yurtimiz kelajagiga daxldorlik ruhida tarbiyalashga qaratilgan “Ma’rifat ulashib” loyihasi o'tkazilmoqda. Ushbu tadbir doirasida Jamoat xavfsizligi universitetiga taniqli adiblarimiz Nazar Eshonqulov, Norqobil Jalilov va Abdumajid Azimovlar tashrif buyurishdi. Mehmonlar Jamoat xavfsizligi universiteti harbiy orkestr jamoasi tomonidan musiqiy chiqish bilan kutib olindi. Tadbir Milliy gvardiya qoshidagi harbiy musiqiy akademik litseyi o’quvchilarining ishtiroki, Jamoat xavfsizligi universiteti kursantlarining qurol bilan ko’rgazmali va qo’l jangi chiqishlari bilan davom etdi. Yozuvchi adiblarimiz esa Prezidentimiz tomonidan universitetga yaratib berilayotgan sharoitlar va zamonaviy ta’lim tizimi bilan yaqindan tanishib chiqishdi. Adiblar “Yashil makon” umummilliy loyihasi doirasida barpo etilgan “Ma’rifat bog’i” hududida bo’lib, uning o’ziga xos xususiyatlari va imkoniyatlari haqida ma’lumotga ega bo’lishdi va ko’chatlar ekishdi.  Loyiha asosida adiblar bilan birgalikda Temuriylar maktabi o’quvchilari, universitet kursant va talabalari ishtirokida ijodiy uchrashuv o’tkazildi. Samimiy suhbat va ochiq muloqot tarzida o'tgan suhbatda adib asarlari va zamonaviy o'zbek adabiyotining o'ziga xos tamoyillari haqida talaba va kursantlar tomonidan berilgan savollarga ijodkorlar atroflicha javob berdilar. Tadbir so’ngida esa mehmon ijodkorlar Jamoat xavfsizligi universiteti tomonidan esdalik sovg’alari bilan taqdirlanishdi. Universitetda yoshlar ma’naviyatini yuksaltirish, ular o’rtasida kitobxonlikni keng targ’ib etish, mutolaa madaniyatini shakllantirish chora-tadbirlari mehmonlarda yaxshi taassurotlar uyg’otdi.