Yangi O‘zbekistonda qadimiy qadriyatlarimiz, xususan mardlik, jasurlik, vatanparvarlik, gumanizm g‘oyalarini o‘zida mujassam etgan milliy sportimiz bo‘lgan kurashni ommalashtirish, rivojlantirish va dunyoga tanitish hamda ushbu qadriyatimizni umumjahon durdonasiga aylantirish borasida bir qator salmoqli ishlar amalga oshirilmoqda. Xususan, O‘zbekiston Respublikasi Prezidentining 2020-yil 4-noyabrdagi “Kurash milliy sport turini rivojlantirish va uning xalqaro nufuzini yanada oshirish chora-tadbirlari to‘g‘risida”gi PQ-4881-son Qarori va O‘zbekiston Respublikasi Prezidentining 2024-yil 20-dekabrdagi “Kurash milliy sport turini rivojlantirish va ommalashtirishni yangi bosqichga olib chiqish chora-tadbirlari to‘g‘risida”gi PQ-450-son Qarorlarini ijrosini ta’minlash maqsadida, shuningdek, “O‘zbekiston Respublikasi Oliy harbiy ta’lim muassasalari o‘rtasida ma’naviy-ma’rifiy hamda sport yo‘nalishlari bo‘yicha hamkorlik rejasi”ga asosan, 2025-yilning 28-29-mart kunlari Toshkent shahar Yangihayot tumanida joylashgan sport maktabida O‘zbekiston Respublikasi Favqulodda vaziyatlar vazirligi akademiyasi tashabbusi bilan sportning “Kurash milliy turi” bo‘yicha musobaqa tashkil qilindi. Qizg‘in davom etgan ushbu musobaqada O‘zbekiston Respublikasi Qurolli Kuchlar akademiyasi, O‘zbekiston Respublikasi Jamoat xavfsizligi universiteti, O‘zbekiston Respublikasi Davlat xavfsizligi xizmati akademiyasi, O‘zbekiston Respublikasi Favqulodda vaziyatlar vazirligi akademiyasi, O‘zbekiston Respublikasi Ichki ishlar vazirligi akademiyasi, O‘zbekiston Respublikasi Bojxona instituti hamda O‘zbekiston Respublikasi Axborot-kommunikatsiya texnologiyalari va aloqa harbiy instituti, O‘zbekiston Respublikasi Chirchiq Oliy tank-qo‘mondonlik muhandislik bilim yurti, lari kursantlari 55, 60, 66, 73, 81 va 81+ kg vazin toifalarida keskin bahs olib bordilar. Musobaqaning yakuniy natijalariga ko‘ra umumjamoa hisobida O‘zbekiston Respublikasi Jamoat xavfsizligi unversiteti terma jamoasi faxrli 1-o‘rinni egalladi. O‘zbekiston Respublikasi Qurolli Kuchlar Akademiyasi terma jamoasi faxrli 2-o‘rinni egallagan bo‘lsa, O‘zbekiston Respublikasi Ichki ishlar vazirligi Akademiyasi hamda O‘zbekiston Respublikasi Chirchiq oliy tank-qo‘mondonlik muhandislik bilim yurti terma jamoalariga faxrli 3-o‘rin nasib etdi. Yakunda tashkilotchilar tomonidan g‘olib va sovrindorlarga medal, diplom, kubok va qimmatbaho esdalik sovg‘alari tantanali topshirildi.