Joriy yilning 4-5 may kunlari O’zbekiston Respublikasi Favqulodda vaziyatlar vazirligi Milliy Kinologiya markazida “Barcha zotlarning milliy itlar ko'rgazmasi” bo’lib o’tdi. Unda barcha kuch tuzilmalari kinolog markazlari va havaskor kinologlar ishtirok etdi. Milliy gvardiya nomidan Jamoat xavfsizligi universiteti kinologiya markazi harbiy xizmatchilari va xizmat itlari ishtirok etishdi. Musobaqada “Jesika” laqabli xizmat iti nemis ovcharkasi zoti bo’yicha faxrli birinchi o’rinni qo’lga kiritdi. Shuningdek, “Birma” laqabli xizmat iti Belgiya ovcharkasi "zoti" bo’yicha yosh itlar o’rtasida faxrli birinchi o’rinni qo’lga kiritdi. Shuningdek, musobaqada ishtirok etayotgan barcha itlar o’rtasida “Eng Nasldor it” nominatsiyasini “Jesika” laqabli xizmat iti qo’lga kiritdi. Ta’kidlash kerakki, bu kabi natijalarga universitet kinologiya markazi bir necha yillardan beri erishib kelmoqda va faxrli o’rinlarni egallamoqda. Fursatdan foydalanib Universitet rahbariyati va shaxsiy tarkibi universitet kinologlariga keyingi xizmat faoliyatida ulkan zafarlar va omad tilaydi!