Мамлакатимизда амалга оширилаётган ёшларга оид давлат сиёсати негизида ҳам жисмоний, ҳам маънавий жиҳатдан соғлом, ҳеч кимдан кам бўлмасдан, бошини баланд кўтариб яшайдиган, Ватанимизнинг тақдири ва истиқболи учун масъулиятни ўз зиммасига олишга қодир бўлган баркамол авлодни тарбиялашдек устувор мақсад мужассам. Хусусан, жорий йилнинг 12 сентябрь куни Ўзбекистон Республикаси Жамоат хавфсизлиги университетида ҳарбий хизматчилар ва ходимлар ўртасида ташкил этилган “Тарих билимдони” танловининг Миллий гвардия босқичи ҳам амалга оширилаётган эзгу ишларнинг яна бир ёрқин исботидир. Қизғин ўтган танловда 18 нафар иштирокчилар “Блитс”, “Тест саволлари” ҳамда “Суратдаги тарих” шартлари бўйича ўзаро беллашдилар.
Танлов натижаларига кўра қуйидаги ўринлар қайд этилди:
3-ўринни 98162-сонли ҳарбий қисм иштирокчиси катта лейтенант Рахмонов Номозбек Рўзибой ўғли қўлга киритиб, 3-даражали диплом билан;
2-ўринни Темурбеклар мактаби ўқувчиси Эшпулатов Шоҳруҳ Даврон ўғли қўлга киритиб, 2-даражали диплом билан;
1-ўринни Жамоат хавфсизлиги университети курсанти Давронов Алижон Амонович қўлга киритиб, 1-даражали диплом билан тақдирланди.
Ғолиблар ҳамда тадбирда фаол иштирок этган қатнашчилар қимматбахо совғалар билан тақдирланишди. Шунингдек, тадбир давомида курсантлар таркибидан иборат “Ёш театрчилар”, “Ёш шоирлар” ва “Алвон беретлар” бадиий жамоалари томонидан тақдим этилган ижодий чиқишлар тадбир иштирокчиларига кўтаринки завқ бағишлади.
